Papeis da Academia 2006-2007

Benvida da directiva

Papeis da Academia nace para ser un instrumento máis que contribúa á mellor función que a Academia Galega do Audiovisual pode ter: a do coñecemento. Xunto con documentos que gardan memoria dun ano de audiovisual galego, o que vai dende maio de 2006 a xuño 2007, Papeis ofrécenos unha oportunidade que habemos coidar, a de dar testemuño desde o ámbito académico de qué e cómo somos, cómo nos ven e cómo vemos.

A transición dos debates que a Academia acolleu para reflexionar sobre o estado das cousas do noso audiovisual forma parte dese testemuño.

E tamén o fan as colaboracións que varios membros da Academia enviaron. Papeis da Academia debe ser, sobre todo, unha publicación construída coas achegas do seu principal – único- patrimonio: os académicos. Todos fomos convidados a participar en liberdade, cadaquén coa súa opinión , co seu tema, co seu ton.

Este é o primeiro número. E han de vir máis. Estamos certos de que, coa experiencia deste primeiro paso, no vindeiro número haberá máis voces. Precisámolas. Todas son necesarias. Vivimos un país e un tempo nos que por veces se volve frecuente un silenzo que pouco ten que ver coa discreción, o que xorde do temor a que falar comprometa. Cando, seguramente, nada compromete tanto coma ese silenzo.

Papeis debe ser reflexo da gran pluralidade – de pensamento e de obra – que acolle a Academia.

Co desexo de ánimo e sorte para continuar co apaixonante traballo que nos é común, co agradecemento a quen nos apoia nesta iniciativa – institucións e empresas anunciantes- e co recoñecemento aos que elaboraron os contidos que veñen a continuación, emprázovos a unha nova entrega dos Papeis da Academia, a do ano que vén, que recolla o que agora, todos , estamos a facer.


Papeis da Academia 2007-2008

Benvida da directiva

Con este segundo número, Papeis da Academia da un novo paso na súa vocación de ser plataforma e testemuño dos traballos, circunstancias e opinións do colectivo que formamos a Academia Galega do Audiovisual.

Como sabes, a publicación que tes nas mans está á enteira disposición dos académicos para que nela poidamos contar e pensar en voz alta. Cremos que é sempre positivo airear os distintos xeitos de pensar, favorecer os debates, coñecer os puntos de vista dos que , cun criterio ou outros, estamos a construír cada día o audiovisual galego. Poucos cometidos igual de relevantes pode ter unha academia.

Neste número vas a atopar rexistro das conversas promovidas dende a Academia no formato clásico, ao redor da TDT, e na contorna virtual da nosa páxina web, onde o Estado das Cousas serviu para reflexionar acerca da crise de modelo audiovisual clásico, das relacións co literatura, da lingua e máis do xeito en que presentar os nosos Premios. Aos que participaron nos debates agradecémoslles a súa xenerosidade. Como lle agradecemos aos que nos achegaron artigos sobre unha variedade de aspectos dos moitos que acaban por conformar o mundo audiovisual.

E has atopar tamén datos con boa parte do que o curso, os doce meses transcorridos entre xullo do 2007 e xuño deste ano, deu de si, do que fixemos, dos que nos deixaron.

Temos a impresión de que estes segundos Papeis achéganse máis cos primeiros ao que queremos, e contamos con que esa mellora continúa dun ano a outro. Está na man de todos e cada un de nós que se xunten aínda máis voces e así o retrato de nós mesmos tema máis definición. A Academia vive conforme á vida que os académicos lle procuramos.


Papeis da Academia 2008-2009

Benvida da directiva

Velaquí un novo número dos Papeis da Academia, o terceiro, o que grava unha imaxe do que fomos, fixemos e pensamos ao longo do curso 2008-09. Mestura de información e opinión, os Papeis procuran unha vía de expresión á que posiblemente sexa a principal razón de ser desta Academia: axudar a coñecérmonos e a que nos coñezan, ser espazo de diálogo para a causa común de cantos traballamos en e a prol do audiovisual galego.

Son os Papeis que corresponden a un curso que, como todos sabemos, resultou ser máis complicado do habitual. Os problemas de coordinación institucional, a prolongada parálise administrativa con motivo do cambio de goberno son fenómenos que non casan ben coa idea de que o audiovisual é un sector estratéxico, que non cadran cun balance cada vez máis variado, complexo e satisfactorio do traballo dos creadores e profesionais.

Foi tamén o curso en que unha nova directiva asumimos as rendas da Academia. Facémolo coa ilusión de manter e mellorar esta casa común, e coa ilusión tamén de animar a tantos que aínda non están a que participen connosco. A Academia é cousa de todos os que construímos o audiovisual galego.

Que o curso que entra nos sexa propicio.


Papeis da Academia 2009-2010

Benvida da directiva

Achegamos un novo número de Papeis da Academia, o cuarto, no que tentamos amosar o que fomos, fixemos e pensamos ao longo do pasado curso 2009-2010.

Un número que pretende ser un instrumento máis que contribúa á primordial función da nosa Academia: o coñecemento. Nel pretendemos amosar como somos, como nos ven e como nos vemos. Como todos sabedes e por razóns coñecidas de todos, este curso resultou ser duro e difícil. Como Academia mantivemos encontros e debates coa administración, fluidos pero tamén coa seriedade e firmeza que consideramos que requiren situacións como a que estamos a pasar. Encontros e debates nos que sempre defendemos a idea de que o audiovisual é un sector estratéxico para o noso país, con creadores e profesionais cada vez máis prestixiados e valorados tanto dentro como fóra das nosas fronteiras.

Tentamos tamén, e seguimos con esa teima, a unidade e o diálogo con todas as asociacións e colectivos que conformamos o sector, na defensa dos nosos intereses comúns, mantendo a pretensión de ser a casa común de todos os que traballamos en e a prol do audiovisual galego. Seguimos coa ilusión de manter e mellorar esta casa común e animamos a moitos que aínda non están nela a que participen connosco.

Seguramente aínda nos agarden momentos duros e difíciles. Continuaremos con ánimo o noso apaixoante traballo e queremos agradecer a colaboración de todos os que contribuídes a que estes PAPEIS sexan unha realidade (a administración, colaboradores, elaboradores de contidos, etc.).

Agardamos que cada vez se xunten máis voces para que nos vindeiros Papeis o retrato de nós mesmos teña maior definición. A Academia será o que os académicos queiramos que sexa.

Unha aperta para todos e que o curso vindeiro nos sexa propicio.


Papeis da Academia 2010-2011

Aquí vos facemos chegar o quinto número de Papeis da Academia, con alguns cambios con respecto a números anteriores pero en definitiva coa mesma esencia, a de intentar achegarvos un pouco a todos parte do que sucedeu e nos sucedeu ao longo deste curso 2010-2011.

Non sería xusto deixar para o final o agradecemento que toda a xunta directiva actual quere amosar coa directiva saínte. O seu foi un traballo duro, difícil, non sempre valorado na súa xusta medida e, como dicía un compañeiro na última asemblea da Academia, valente. Na nosa intención está continuar polo mesmo camiño que eles trazaron, o camiño da unidade con asociacions e colectivos que conforman o sector, e de diálogo coa administración. Seguramente agora máis ca nunca é necesario que todos comprendamos que o noso é un sector polo que hai que apostar de maneira firme e sen excusas. Chegamos a onde chegamos co esforzo, o traballo e a implicación de profesionais e das distintas administracions. Un paso atrás, incluso un simple deixarse levar pola inercia, significaría botar pola borda máis de vinte anos de pasos curtos, pero decididos e sempre cara adiante.

Tamén agora máis ca nunca se fai necesario reclamar compromiso e confianza á CRTVG para que siga sendo o motor e impulsor do noso audiovisual, noso, de todos, dos preto de tres mil traballadores cos que conta o sector máis dos que cada ano se incorporan procedentes das distintas universidades, escolas ou institutos adicados ao audiovisual. Pero, sexamos honestos, tamén nos toca a nos, os profesionáis, asumir o mesmo compromiso e seguir apostando polo talento e a creatividade, pero aportando o traballo e as ideas necesarias para dar ese paso definitivo que nos achegue cada vez máis a internacionalización do noso sector e nos consolide como o que somos: unha industria que xenera beneficios económicos, culturáis e sociáis.

Por último desexar que, entre todos, sexamos capaces de aglutinar cada vez máis o sector e que se incremente de maneira significativa o número de académicos. Aínda quedan moitos compañeiros e compañeiras que necesitamos ao noso lado para levar adiante algunhas desas ideas que, incluso en tempos difíciles, nos impidan dar un paso atrás.


Papeis da Academia 2011-2012

Rematabamos a introducción ao anuario do pasado ano desexando que entre todos foramos capaces de aglutinar o sector e desexando tamén que se incrementase de maneira significativa o número de académicos. Precisamente así queremos introducir este sexto número de Papeis da Academia. Máis ca un desexo, desde a xunta directiva queremos transmitirvos a necesidade de incorporar a compañeiros e compañeiras que nos axuden a manter viva esta Academia. Aproveitamos, pois, estas lineas para solicitar de vos, do mesmo xeito que o solicitamos na última asemblea de socios celebrada o pasado mes de xuño, a colaboración para aportar cantas máis ideas mellor, de cara a conseguir o obxectivo de alcanzar para o próximo ano a cifra dos cincocentos académicos.

Este non foi un ano fácil. Para ninguén. E todo indica que o que ven non vai ser moito mellor. Desde a xunta directiva intentaremos suplir a falta de recursos con entusiasmo e esforzo para que o noso audiovisual siga tendo a presencia e a importancia que os profesionais que compoñemos este sector merecemos. Presencia e importancia que, por outra parte, seguramente nos vai custar máis manter do que nos custou conseguir…

Pero por unha vez, e sen que sirve de precedente, deixemos a falsa modestia a un lado e digamos ben alto e ben claro a quen lle poida interesar que nesta terra andamos sobrados de talento e que, aínda que as peores circunstancias no lo demanden , somos incapaces de facer mal o noso traballo…e non porque non queiramos facelo. Simplemente… porque non sabemos como.

Por último agradecer toda a colaboración, o esforzo, o traballo e o entusiasmo que tantos compañeiros e compañeiras brindaron, en moitos casos de maneira desinteresada, para sacar adiante a Gala dos Premios Mestre Mateo deste ano. Grazas, por suposto, ós distintos organismos públicos e privados polo seu apoio e dunha maneira especial moitas grazas ós grandes profesionáis de TVG que traballaron neste gala, pola súa profesionalidade desde logo, pero sobre todo por demostrarnos algo que xa sabiamos, pero que de cando en vez non ven nada mal recordar e recordarnos: faenamos todos no mesmo barco.


Papeis da Academia 2012-2013

Máis alá das frases feitas, nesta xunta directiva sabiamos que os tempos eran malos e que, dificilmente, todo ía ser suceptible de mellorar. Aínda así, sentímonos especialmente satisfeitos de todas e cada una das actividades que puidemos realizar ao longo destes últimos anos. Todas elas grazas ao tremendo esforzo, colaboración e axuda de moitas persoas, de moitos organismos. Conseguímolo a forza de insistir, de dialogar, de pelexar unha e outra vez facendo uso dos mellores argumentos que temos. Facendo ver con paixón, pero tamén con datos a importancia do noso sector.

Non estamos cansos pero cada ano, faise máis e máis dificil sacar adiante os nosos premios Mestre Mateo, ou poder organizar a nosa Academia Aberta, incluso encher de bos contidos o noso Anuario tamén leva o seu traballo. Afortunadamente, cada ano, tamén contamos con maior participación e colaboración para que as galas sigan sendo o espectáculo que, con crise ou sen crise, sempre foi. A asistencia e participación nas Masterclass da Academia Aberta indícannos que estamos no bo camiño. Con todo seguimos necesitando, e non sabedes ata que punto, seguir incrementando o número de académicos. Dito esto, tamén é o momento de agradecer, e de maneira moi especial, a todos aqueles compañeiros e compañeiras que, con moito sacrificio, continúan con nos.

Virán tempos mellores, estou convencido, pero de non ser así, o audiovisual galego nunca deixará de existir mentres existan técnicos, actores, actrices, guionistas, músicos, directores, directoras, en definitiva, creadores… e algún que outro productor ou produtora que ame o seu traballo. Respecto ao audiovisual en Galicia…desgraciadamente, ese é un tema que, cada vez, está menos nas mans dos que o queremos, e queremos facer con criterios de calidade e profesionalidade.


Papeis da Academia 2013-2014

Calquera diría que non foi moito o tempo que pasou, sen embargo este será xa o cuarto anuario da presente directiva. O cuarto e, polo tanto, último para a maioría dos que formamos esta xunta. Hai catro anos sabiamos perfectamente que, desde logo, non ía ser este o mellor momento para poñerse á fronte da Academia Galega do Audiovisual. Máis alá de intentar manternos e procurar sobrevivir nun sector no que cremos e para o que, humildemente pensamos, os profesionais da nosa terra están sobradamente preparados, tratábase de conseguir da mellor maneira posible non dar un paso atrás. Se o demos ou non, serán o tempo e as distintas análises que no seu día se fagan, quen o xulgue; pero se calquera día, somos conscientes de que todo o que o audiovisual galego conseguiu en uns poucos anos se perdeu en alguns menos, alguén deberá facer constar onde sexa e ante quen sexa, que os culpables teranse que buscar moi lonxe do lugar que os profesionais do audiovisual galego ocupan, ou ocuparon.
Nunca ninguén nos poderá reprochar non poñer todo da nosa parte: o talento, o esforzo, a entrega, a ilusión ou os sacrifios necesarios, deixando como case único límite o que a dignidade e o respecto profesional nos marcan.

Ao longo destes case catro anos, desde a xunta directiva da Academia, non quixemos ser menos que o resto de compañeiros e compañeiras de profesión á hora de aportar sobre todo ilusión, entrega, esforzo e algún que outro sacrificio. Seguramente aportamos pouco máis ou menos a mesma ilusión e entrega, os mesmos esforzos e sacrificios que as anteriores xuntas directivas; sabemos que quen nos suceda, a todo isto, engadirá o talento necesario para que nunca ninguén teña que sentir nostalxia do que algún día fomos.

Con todo…foi unha maravillosa viaxe cargada de coñecemento e aprendizaxe.


Papeis 2014-2015

Presentamos unha nova edición dos Papeis da Academia que neste 2015 é totalmente dixital. Coincidindo coa renovación da nova páxina web, na Academia queremos ir un paso máis aló na súa evolución e converter a publicación nunha ferramenta da web permanentemente actualizada e que nos permita ter unha panorámica do sector, chegando así a máis público.

Queremos que por un lado recolla informes e reportaxes máis profundos sobre cuestións de actualidade do audiovisual e por outro que se constitúa como unha base de datos, onde poder consultar información das obras e profesionais galegos. Así, neste ano comeza esta última transformación dos Papeis.


Papeis 2016

Benvida da directiva

 

Queridxs compañeirxs,

Un ano máis presentamos o anuario da Academia Galega do Audiovisual. E un ano máis presentámolo non só aos académicos e académicas, presentámolo tamén ao conxunto da cidadanía.  Un ano máis, os contidos deste anuario van estar na nosa web a disposición de todas as persoas que os queiran consultar: profesionais do audiovisual e da cultura galegas, especialistas, estudantes, afeccionados ou xs nosxs espectadores.

O argumento central deste ano é a situación laboral dxs traballadorxs do noso audiovisual. Varixs profesionais van contar a súa experiencia. Sabemos que estamos inmersos nunha crise económica global. Unha crise que fixo que as condicións laborais dxs traballadores de calquera sector económico se deteriorasen. Por suposto o audiovisual galego non é alleo a esa crise. Sempre se di, por características do noso sector, que somos xs primeiros en vernos afectadxs pola crise e xs últimxs en saír dela.Vexamos como afectou ao noso traballo esa crise, como a afrontaron diferentes compañeiros e compañeiras. Vexamos se somos quen de abrir un necesario debate. Vexamos se somos quen de  aportar algunha solución.

Como novidade, este ano os contidos do noso anuario son maioritariamente audiovisuais. Contamos con varias reportaxes, entrevistas gravadas a diferentes profesionais que contan a súa experiencia.

Esperamos que este novo formato sexa do voso agrado. E o máis importante, agardamos que o que alí sae reflectido contribúa a facer un audiovisual galego mellor, máis xusto e que o que conten xs diferentes compañeirxs axude a unha necesaria reflexión.

E un ano máis dedicamos parte do noso anuario a un compositor de bandas sonoras galego. Este ano temos a honra de presentar unha selección de obras do compositor Manu Riveiro. Das súas mans e o seu maxín xurdiron pezas tales coma as creadas para O descoñecido, Padre Casares ou Hospital Real.

Xunto ao anuario, hai uns días presentamos na nosa web o catálogo de festivais e mostras de cine e audiovisual de Galicia. Tamén os premios de investigación que levan o nome da pioneira María Luz Morales, unha figura que debe ser reivindicada unha e outra vez. Ademais, estamos a traballar arreo na elaboración dun catálogo coa totalidade das obras audiovisuais creadas en Galicia, que agardamos poida ver a luz o vindeiro ano. Isto non é todo: hai uns meses presentamos a primeira edición das Semanas da Música do Audiovisual, a primeira do que estamos seguros vai ser un referente en todo o Estado sobre músicas no audiovisual.

Estamos moi orgullosxs de que a Academia sexa unha das impulsoras do  “Observatorio de Igualdade das Artes Escénicas e do Audiovisual” que nace con tres obxectivos fundacionais: Implicar a todas as asociacións profesionais galegas do sector na implantación de estratexias de igualdade; analizar e avaliar de forma profunda a situación socio-laboral das mulleres nas artes escénicas e o audiovisual e fomentar a igualdade mediante propostas concretas dirixidas a entidades públicas e privadas. Cremos que accións como ésta son fundamentais na nosa Academia. Tanto é así, que cremos que a Academia naceu para cumprir este tipo de funcións. Xunto a todo isto fixemos unha serie de master class, debates e moitas máis actividades.

Todas estas accións e outras que agardamos poder facer no futuro, son posibles só grazas ao voso constante apoio. As vosas opinións, os vosos comentarios, tamén as vosas críticas son indispensables, fundamentais, necesarias para conseguir unha Academia máis participativa, unha Academia de todas, unha Academia mellor.

Agardamos que este anuario sexa do voso interese. Agardamos que sexa do interese da cidadanía, do noso público.  Agardamos, por riba de todo, que sexa de utilidade.

 

Vento nas velas, compañeiros e compañeiras.

EDITA:Academia Galega do AudiovisualPraza Pintor Sotomayor nº 1, 2º15001 A CoruñaTel: 981 227 701 / 981 208 393

COORDINACIÓN EDITORIAL:Camilo Franco e Ana M. López

AGRADECEMENTOSConcello de Santiago polo uso do Centro Sociocultural da CaramoniñaCentro Galego de Arte Contemporánea

Os autores dos artigos e vídeos desta edición expresan libremente os seus puntos de vista, que non son necesariamente compartidos polo conxunto da Academia. Esta acolle no seu seo unha pluralidade de opinións.